د بدخشان مشرانو د سړکونو د رغولو او د برېښنا د تأمین غوښتنه وکړه

د خپرېدو نېټه: Apr 04, 2012

د ۱۳۹۱ کال د وري ۱۶مه - د افغانستان د اسلامي جمهوریت جمهور رئیس حامد کرزي د بدخشان ولایت له عالمانو، مشرانو او مخورو سره په ارګ کې وکتل.

په دې کتنه کې چې نن له غرمې وروسته تر سره شوه، د نورو په استازیتوب ډاکټرې نیلوفر ابراهیمي خبرې وکړې او په بدخشان ولایت کې یې د سړکونو د رغولو، د برېښنا د تأمین او نورو ستونزو د حل  غوښتنه وکړه.

د بدخشان استازو د هېواد له جمهور رئیس څخه وغوښتل چې حکومت دې ددغه ولایت په غرونو کې اوسیدونکي خلک ګاونډیو ولایتونو او یا هوارو سیمو ته ولېږدوي تر څو د احتمالي سېلابونو د راوتلو له امله زیانمن نه شي.

همدا راز په دې کتنه کې د نوموړي ولایت مشرانو د روغتیایي کلینکونو د جوړولو، د پوهنې د بهبود او د غوره امنیت د تأمین لپاره یې د جدي پاملرنې غوښتنه وکړه.

د افغانستان د اسلامي جمهوریت جمهور رئیس حامد کرزي د بدخشان ولایت د مشرانو او عالمانو د غوښتنو او وړاندیزونو له اورېدو وروسته، هغوی ته ډاډ ورکړ چې حکومت به ددوی د ستونزو د حل په برخه کې لازم اقدامات تر سره کړي.

د غونډې په دوهمه برخه کې چې د جمهور رئیس د سلاکار،  پوهاند نعمت الله شهراني په مشرۍ جوړه شوه، د بدخشان ولایت د یادو شویو ستونزو په اړه د کلیو د پراختیا، عامې روغتیا او فوائد عامې وزیرانو او د پوهنې، اوبو او برېښنا او مالیې وزارتونو معینانو او د پېښو په وړاندې د مبارزې له رئیس سره خبرې وشوې، چې په دې برخه کې د حکومت لخوا د لازمو اقداماتو ژمنه وشوه.