جمهور رئیس حامد کرزی: که د افغانانو ژوند خوندي نه وي، ستراتیژیکه همکارۍ معنی نلري

د خپرېدو نېټه: May 07, 2012

د ۱۳۹۱ کال د غویي ۱۸مه - د افغانستان د اسلامي جمهوریت جمهور رئیس حامد کرزي نن مازدیګر په افغانستان کې د ناټو ځواکونو لوی  قوماندان جنرال جان الن او د امریکا د متحده ایالاتو سفیر راین کراکر  د یوې فوق العاده غونډې لپاره ارګ ته وروغوښتل او د هغو ملکي تلفاتو په هکله یې ورته څرګندونې وکړې چې د افغانستان په څلورو ولایتونو کې زموږ هېوادوالو ته رسېدلي دي.

ددغو بمباریو له امله چې د ائتلاف د ځواکونو له خوا له شنبې راهیسې په لوګر، کاپیسا، هلمند او بادغیس ولایتونو کې تر سره شوي دي،  د ښځو او ماشومانو په ګډون زموږ لسګونو بې ګناه هېوادوالو خپل ژوند له لاسه ورکړی او په شهادت رسیدلي دي.

حامد کرزي د ناټو لوی قوماندان او د امریکا د متحده ایالاتو سفیر ته وویل چې افغانستان ملکي تلفات او پر کلیو بمبارۍ نه پخوا منلي وو او نه ورته اوس د منلو وړ دي.

 ده زیاته کړه چې  د ملکي تلفاتو مسأله هر ځل د افغانستان او امریکا د اړیکو د تشنج باعث شوې ده. جمهور رئیس د ناټو لخوا خپل سري عملیات او پر ملکي خلکو بمبارۍ نه یوازې د افغانستان د حاکمیت، بلکې د انسانانو د ژوندانه مسأله هم وبلله چې په هېڅ صورت ترېنه سترګې نشي پټېدلای.

حامد کرزي زیاته کړه چې افغانستان له امریکا سره د ستراتیژیکو همکاریو سند په دې دلیل لاسلیک کړ چې د ورته پېښو مخه ونیول شي او د افغانانو ژوند مصؤون شي، ده وویل چې که د افغانانو ژوند خوندي نه وي نو ستراتیژیکه همکارۍ خپله معنی او مفهوم له لاسه ورکوي.

په مقابل کې د ناټو عمومي قوماندان جنرال جان الن وویل چې شخصاً دی ددغو پېښو مسؤولیت په غاړه اخلي او له جدي پلټنو وروسته به ډېر ژر خپل راپور د افغانستان جمهور رئیس ته وړاندې کړي.

د یادونې وړ ده چې د افغانستان جمهور رئیس د هلمند، بادغیس، لوګر او کاپیسا له والیانو او د پېښو د سیمو له چارواکو سره ټیلیفوني خبرې کړي او په دې اړه یې ورڅخه دقیق او پوره معلومات غوښتي دي.