د شاتوت بند جوړولو تفاهم لیک د لاسلیک په مراسمو کې د جمهوررئیس محمد اشرف غني د وینا ژباړه

د شاتوت بند جوړولو تفاهم لیک د لاسلیک په مراسمو کې د جمهوررئیس محمد اشرف غني د وینا ژباړه

چهارچنار ماڼۍ
د بښوونکي او مهربانه خدای په نامه
د هند لومړی وزیر جلالتماب نرېندرا مودي، د افغانستان د جمهوري ریاست ښاغلی لومړی مرستیال او د جمهوري ریاست محترم دویم مرستیال، د افغانستان د بهرنیو چارو وزیر، د هند د بهرنیو چارو وزیر، د کابینې غړو، محترمو همکارانو؛
ښاغلی لومړی وزیر؛
د ډېرې خوښۍ ځای دی چې په انلاین ډول په دې هیله بښونکو مراسمو کې له تاسو سره یو ځای حضور لرم. افغانستان ته ستاسو پاملرنه او د کابل او افغانستان خلکو ته د ژوند بښونکو او روزي ګټونکو پروژو ډالۍ کول د لویوالي، ولسواکۍ او بشرپالنې سمبول او په ټوله نړۍ کې د ګډو ګټو، او متقابل درناوي باور ښودنه کوي.
لومړی، اجازه راکړئ د هند د خلکو پر ژوند او چارو د کرونا ویروس د منفي اغېزو په اړه د خلکو او د افغانستان حکومت د غمشریکۍ مراتب وړاندې کړم. موږ باور لرو چې ستاسو تر زعامت لاندې هند به پر دغو سختیو بریالی کېږي او بیا به د اسیا او نړۍ د ودې په ماشین بدلېږي.
د کرونا د پنځه سوه زره ډوزه واکسین برابرولو په اړه ستاسو تصمیم په دې حساس وخت کې چې پخپله د هند خلک واکسین ته منتظر دي، یوه ډېره ارزښتناکه ډالۍ ده. په لومړۍ مرحله کې به له دې ډوزونو څخه د روغتیایي کارکوونکو چې کرونا ویروس سره د مبارزې په لومړي صف کې قرار لري، د هیواد امنیتي او دفاعي ځواکونو او د زیانمنو اقشارو د واکسین لپاره استفاده وشي. موږ د دې سخاوتمندانه اقدام درناوی کوو.
د شاتوت په اړه؛ پوهېږئ چې کابلیان څه ډول د سرو زرو او واورې ارزښت پرتله کوي؟ په دې متل؛ کابل دې بې زره وي، خو بې واورې نه. د شاتوت بند په جوړېدو سره به د کابل واورې او بارانونه مدیریت شي، ترڅو د روغتیایي اوبو په برابرولو سره د کابل ښار د دوه میلیونه کسانو تنده خړوبه کړي. شاتوت به کابل سیند ته کافي اوبه برابرې کړي، ترڅو کابل یو ځل بیا په ګڼو شنو ونو زرغون ښار، د تفریح، هنر او صنعت په مرکز بدل شي.
د شاتوت بند ذخیره او د هغه سولري پمپونه به موږ د دې وړ وګرځوي چې د کابل ښکلي ښار د طبیعت جوړولو لیدلوری چې د بابر په شاعرانه تصوراتو او د یو زر کلونو په جریان کې مشهورو شاعرانو اېستلی، عملي کړو.
اجازه راکړئ د کابل د خلکو او افغانستان په استازیتوب له تاسو او د هند لوی ملت څخه د دې ژوند بښونکې ډالۍ او د واکسین برابرولو مننه وکړم.
ښاغلی لومړی وزیر؛ ستاسو تر زعامت لاندې هند له درې میلیاردو څخه زیات ډالر له افغانستان سره مرسته کړې ده او د ځانګړنې لامل یې دا دی چې د دغو مرستو نوي سلنه د بودجې له لارې مصرف شوې دي چې زموږ د لومړیتوبونو ښودنه کوي او له بل لوري د افغانستان لپاره د هوساینې اساسات او ډیموکراتیک ثبات رامنځته کوي.
د حکومت په راس کې ستاسو په راتلو، د هند مرستې زموږ د هیواد په هره څنډه کې برجسته او ځانګړې شوې دي؛ سلما بند، د انرژۍ لېږد مزو، د افغانستان د پارلمان ودانۍ چې زموږ په هیواد کې د ولسواکۍ سمبول دی، سلګونه پروژې چې د خلکو ژوند یې بدل کړی او په ځانګړي ډول د افغانستان د بشري پانګې د انکشاف په برخه کې. هند هر کال افغان ځوانانو ته یوزر تحصیلي بورسونه ورکړي. همدا اوس شپاړس زره افغانان په هند کې پر زده کړو بوخت دي. د دوی هر یو د هیواد له سلګونه زره نورو زده کوونکو سره یو ځای کېږي او اوسمهال هغه اړیکې څو برابره شوې دي چې له زرګونو کلونو یې موږ سره تړلي یوو. موږ له تاسو مننه کوو.
پردې سربېره، هند په انکشافي برخه کې د افغانستان یو شریک او واقعي همکار دی. ښاغلی لومړی وزیر، کله چې ما او تا په ډيلي کې د هوایي دهلېز په اړه خبرې وکړې، د یو کال په جریان کې، دغه مفکوره په واقعیت بدله شوه چې د افغانستان په خصوصي سکتور کې یې یو باور او فوق العاده ډاډ رامنځته کړی دی. ستاسو د دې نوښت او ملاتړ له برکته، اوس افغانستان له پنځوسو هیوادونو سره د هوایي دهلېز له لارې وصل شوی دی.
د چابهار ـ زرنج هوایي دهلېز د صبر او زغم بېلګه دی. اجازه راکړئ د هند انجینرانو، شرکتونو، ډيپلوماتانو او ملکي کارکوونکو چې د دې پروژې د تحقق لپاره یې هېڅ ډول هڅې درېغ نه کړې، درناوی وکړم.
کله چې د مالیې وزیر وم د زرنج ـ دلارام سړک په اړه مو خبرې کولې، دغه سړک یوه خرابه وه. د زرنج نفوس له اتو زرو څخه کم و، خو نن زرنج غوړېدلی او د هرې ورځې په تېرېدو سره د ودې په حال کې دی. موږ یو ځل بیا له ټاګور چې په کابلي والا داستان یې د هندیانو په ذهن کې د کابل او کابلیانو تصویر حک کړی، مننه کوو. نن غواړم د کابلیانو په استازیتوب له تاسو مننه وکړم.
اجازه راکړئ د هند په لا ډېر پراخ رول چې په اوسنیو شرایطو کې یې ترسره کولی شي خبرې وکړم. ښاغلی لومړی وزیر؛ موږ د تاریخ په یوې پرانېستې مقطع کې یوو؛ هغه مقطع چې په هغه کې یو لوی فرصت رامنځته شوی او په ورته مهال متاسفانه له ګواښونو او خطرونو سره هم مخ یوو. هغه فرصت چې رامنځته شوی او سیاسي نوښت چې تاسو ښودلی، له یوه لوري کولی شو د همکاریو له ظرفیت او په سویلي اسیا کې د اتصال له ګټو څخه استفاده وکړو او له بل لوري اسیا څو سوه کاله وروسته یو وار بیا کولی شي د نړۍ په کچه له اقتصادي تحرک په ډکې سیمې بدل شي.
د اسیا د هوساینې، اتصال او ثبات لپاره یو خپلواک، متحد او ولسواک افغانستان اړین دی. د افغانستان د خلکو او په حکومت کې د خپلو همکارانو په استازیتوب له مطلوب هدف څخه چې هماغه خپلواک، ولسواک او متحد افغانستان دی، ستاسو د ملاتړ مننه کوم؛ خپلواک افغانستان چې له پایداره سولې او ډیموکراتیک ثبات څخه برخمن وي. خپلواکي په دې معنی چې موږ باید له یو بل سره د مشارکت رامنځته کولو حق ولرو او دا مشارکت هماغسې مو چې وویل، له ارزښتونو څخه سرچینه اخلي.
سوله د افغانستان د خلکو عمده هیله ده او سولې ته د رسېدو لپاره هم په ملي او هم د دولت په کچه اجماع شته؛ خو هغه سوله چې د تاوتریخوالي د پایته رسېدو لامل شي او د یوې بلې تراژیدۍ پیل یا مقدمه نه وي. موږ باید له پخوانیو تراژیدیو درس واخلو چې تاریخ بیا تکرار نشي او دلته د هند ډيپلوماسي کولی شي اساسي رول ولوبوي.
د افغانستان د بهرنیو چارو وزیر ښاغلي اتمر او د هند د بهرنیو چارو وزیر جي شېنکر څخه د نږدې همکاریو رامنځته کولو مننه کوم، ځکه موږ په داسې وخت کې قرار لرو چې د هوسا او ثبات لرونکي افغانستان لپاره د سیمه ییزې او بین المللي اجماع تضمینونو ترلاسه کول ضروري دي. موږ باید له نړۍ وغواړو چې له ټولو دخیلو اړخونو وغواړي د خپلواکۍ قواعدو او بین المللي اړیکو ته درناوی وکړي، (تروریستانو) ته د پناه ورکولو او د ګاونډیو هیوادونو په چارو کې له لاسوهنې لاس پر سر شي.
ښاغلی لومړی وزیر؛ خطر، د اوسنیو شرایطو غلط درک دی. افغانستان هغه مهال سولې ته رسېدلی شي چې دخیل اړخونه، ملاتړي یې او طالبان په پرانېستې غېږه واقعي سیاسي حللاره ومني. افغانان نه تسلیمېږي او دغه درک باید وي چې افغان امنیتي او دفاعي ځواکونه ماته نه خوري او موږ خپلو خلکو ته د خدمت کولو اراده او ظرفیت له لاسه نه دی ورکړی.
که چېرې خدای مکړه، افغانستان د بې باورۍ شرایطو ته ولاړ شي، د سیمې او نړۍ لپاره به ناوړه عواقب ولري. امنیتي او دفاعي ځواکونه، خلک او د افغانستان حکومت د ډیموکراسۍ، ثبات او امنیت د دفاع په لومړۍ کرښه کې واقع دي.
دلته زموږ او ستاسو وړاندیز دا دی چې ترورېزم باید د یو ایکو سیستم په توګه په پام کې ونیول شي، نه هغه پدیده چې فردي او ډله ییز عمل کوي. ترورېزم یوه ورانوونکې قوه ده او هغه راتلونکی ګواښي چې موږ او تاسو او ټول پاک نیتي خلک یې د جوړولو په هڅه کې یوو. موږ باید ترورېزم مهار کړو، ځکه زر کلن اوږد تاریخ چې افغانستان او هند یې سره نښلولي دي، د بحث تاریخ، د تمدنونو همکاري، زغم او شبکې دي.
ښاغلی لومړی وزیر؛ هغه مطلوب هدف چې موږ یې په لټه کې یوو دا دی چې افغانستان یو وار بیا د اسیا په څلور لارې، د هند دروازه چې په پېړیو په دې نوم مشهوره وه او د همکاریو په بستر بدل شي. افغانستان د لا ډېرو دوستانو په لټه کې دی او نه غواړي د نورو د ناوړه جنجالونو یوه برخه واوسي. موږ د اصولو، ډیموکراسۍ او اتصال لپاره درېږو او د هغه ملاتړ کوو.
ښاغلی لومړی وزیر؛ د افغانستان د خلکو په استازیتوب اجازه راکړئ ستاسو د دې دوو ارزښتناکو ډالیو (واکسن او د شاتوت بند جوړول) مننه وکړم. له تاسو مننه کوم چې د افغانستان په راتلونکي باور لرئ. د هند په ملاتړ له یو پرمختللي افغانستان چې د همکاریو په یو محور بدل شي، ستاسو د ملاتړ مننه کوم. همداراز په دې زماني مقطع کې چې باید له هرې شیبې څخه د خلکو د ژوند ژغورلو او د هغوی د ژوند د اړتیاوو پوره کولو لپاره استفاده وکړو، په دې برنامه کې ستاسو د حضور مننه کوم او د دې پروژې پرانېسته دهغو لا زیاتو کارونو لپاره چې په راتلونکي کې به یې ترسره کړو، په نېک فال نیسو.
مننه