د جمهوررئیس غني په مشرۍ د کابینې غونډه وشوه

د جمهوررئیس غني په مشرۍ د کابینې غونډه وشوه

د جمهوررئیس محمد اشرف غني په مشرۍ د کابینې غونډه، د کابینې د غړو او والیانو په ګډون د ویډیو کنفرانس له لارې نن غرمه جوړه شوه.

په دغه غونډه کې چې په ارګ کې ترسره شوه په پیل کې د تفتیش ادارې د کادر مقررې طرحه د یو مورد په اصلاح سره په پرنسیب کې تصویب شوه.

همداراز کابينې د بهرنيو چارو وزارت اصلاحاتي بستې په اړه خبرې وکړې، جمهور رئیس د ياد وزارت مسوولينو ته لارښوونه وکړه چې دغه اصلاحاتي بسته دې په درې مياشتو کې عملي او په اړه دې د جمهوري ریاست عالي مقام ته ډاډ ورکړي.

وروسته د کابینې غړو او والیانو د ازادو بحثونو پر مهال د سولې پروسې، د ملي او سیاسي اجماع د پیاوړتیا، له نظام څخه د دفاع په خاطر د کابینې غړو د رول، د دولتي ادارو د موثرو او ارزښتناکو خدمتونو وړاندې کولو د څرنګوالي، د وطنوالو ستونزو او شکایتونو ته د رسېدګۍ په موخه د واضح میکانیزم د ایجاد او نورو موضوعاتو په اړه خپل لیدلوري شریک کړل.

کابینې پرېکړه وکړه، په هرو دوو اونیو کې دې یاد بحثونه تکرار شي، ترڅو د کابینې غړي او والیان پر اړوند چارو سربېره د هیواد د ملي مسایلو په اړه هم خپل لیدلوري شریک کړي.