جمهور رئیس غنی، ملی خوفسیزلیک عمومی ریاستی باشلیغی‌نینگ استعفاسینی قبول قیلدی

جمهور رئیس غنی، ملی خوفسیزلیک عمومی ریاستی باشلیغی‌نینگ استعفاسینی قبول قیلدی

کیچه ننگرهار ولایتیده اویوشتیریلگن عملیات و بوگون کابل شهریده یوز بیرگن ترورچیلیک حادثه آرتیدن افغانستان اسلامی جمهوریتی‌نینگ جمهور رئیسی محمد اشرف غنی باشلچیلیگیده فوق‌العاده امنیتی ییغین اوتکزیلدی.

بوگون توشدن سونگ ارگ‌ده اوتکزیلگن امنیتی ییغینده بیرینچیدن کیچه ننگرهار ولایتیده داعش‌گه قرشی اویوشتیریلگن حربی عملیاتده بیر عایله‌نینگ تورت فرزندی اولدیریلگنی آرتیدن مملکت ملی خوفسیزلیک عمومی ریاستی‌نینگ باشلیغی معصوم ستانکزی‌نینگ استعفاسی قبول قیلندی.

جمهور رئیس غنی ملی خوفسیزلیک عمومی ریاستی‌نینگ منصبدارلریگه حادثه‌ده قولی بولگنلر تانیلیب اوستلریدن تیرگاو اوتکزیلیشی اوچون دولت باشقره‌لاوچیلیگی‌گه تانیشتیریلشی حقیده بویروق بیردی.

برچه عملیاتلر مملکت‌نینگ نافذلی قانونیگه استوار بولیشی کیره‌ک‌لیگی اوستیده اورغوله‌گن جمهور رئیس غنی، هر قنده‌ی عملیات قانونگه موافق اوتکزیلشی شرط دیدی.

جمهور رئیس غنی‌نینگ ایتیشیچه، اولکه‌نینگ بیرینچی و مسوول کیشی صفتیده تینچ اهالینی اولدیریش مین چیده‌ی دیگن مساله ایمس و کمینه افغانستان قوراللی کوچلر اعلی باش قوماندانی اوله‌راق مذکور حادثه‌نی آخرگچه ایزله‌یمن.

باشقه تاماندن جمهور رئیس غنی، کیم و قنده‌ی‌ حربی مقامده بولیشیدن قطع نظر اوشبو حادثه‌گه قولی بارلیککه عیبلنگن کیشی بیلن قانون یوزه‌سیدن یانده‌شیلیشی علیحده اورغوله‌دی.

بوگون کابل شهری‌نینگ توقّیزینچی ناحیه‌سیده یوز بیرگن ترورچیلیک هجومگه اشاره قیلگن جمهور رئیس غنی، طالبان حرکتی اویت‌سیزلیک، تولیق قوپّالیک بیلن بو قانلی واقعه‌نی بوینیگه آلدی. مینینگ پیامیم همیشه ملت‌گه تینچلیک پیامی دیر؛ لیکن، طالبان‌نینگ پیامی ایسه هر دایم انتحار، پارتلش و دهشت دیر دیدی او.

جمهور رئیس غنی‌نینگ کوپه‌یتیریشیچه، بیزلرنینگ امنیتی و دفاعی کوچلریمیز طالبان‌نینگ بو قبیل فلاکتلری برابریده مردم، ملی قدریتلر و اولکه‌دن دفاع ایته‌دیلر. ملی کوچلر، طالبان حرکتی قوشیمچه هیچ بیر جنایتچی گروه‌گه بیزنینگ خلقی‌میز تقدیرگه حاکم بولیشیگه رخصت بیرمه‌یدی.