جمهوریین اُستُمان کماش غنی کمال خانی سدا پاچ و به کټ زورگا سپارینت

افغانستانئ اسلامیین جمهوریتئ جمهوریین اُستُمان کماش محمداشرف غنی په کمال خانی سدیئ پاچ کنگئ مکسدا مروچی تاری به نیمروزی ولایتئ بُنجاه زرنجی شارا رست.به ای تروتابا که جمهوریین ریاستئ هر دو کمککار، کار و ادارهیئ مزنین کماش، کابینه لهتین باسک و دگه بُرزرتبین دولتین کاردربر آیرا همراییه کُرت انت، مان نیمروزی بالئ پټا شه دمگیین دایرانی ذمه دارانی، نیمروزی ولایتئ کومین مزن و کماشانی نیمگا وش آتگی گُشتگ بوت و گُونډو به پُلانی غودانی ټیکیئ دیگا آون وش آتگی گُشت انت.اول جمهوریین اُستُمان کماش غنی به کمال خانی سدیئ پاچ کنگئ دودا به جوړ بوتگین کشارگرین ندارگ جاه و بلوچانی دود و ربیدگین دودا دیست و په مُچان آپئ شئونکاریا مُراد بات گُشت.رندا جمهوریین اُستُمان کماش به کمال خانی سدیئ جوړ کنگئ وهدا شه شهید بوتگین انجینر و کار کنوکانی یاتا به جوړ بوتگین منارا پُلانی غودا ایشت و آوانی دیم هونیانی سِتا کُرت.همیراز جمهوریین اُستُمان کماش به آبات و آسوده هالین افغانستانئ امیتا به کمال خانی سدیئ کِروگوران نهال نادینت و په جوانین افغانستانی دعا کُرت.جمهوریین اُستُمان کماش به پردگئ دور کنگا به رسمین رازی کمال خانی سدا پاچ کُرت و به سویچئ جنگا به کانالان پسان بوتگین آپان رادگ کُرت.جمهوریین اُستُمان همیراز به کمال خانی سدیئ باروا به خاطره کتابا وتی خاطرا لیکیت و به موسی شفیق ناما دولتین مدال و نشانئ حمکا دستخط کُرت.جمهوریین اُستُمان کماش غنی به ای دودیئ گُډسرا، به شهید محمدموسی شفیق ناما پوستین تکتا پاچ کُرت و به آپ چاری کنگئ بهرا آیی هذمتان سِتا کُرت.