جمهور رئیس غنی: تیزیم پایه‌لری مستحکم بۉلیشی اوچون دین عالملری‌نینگ اولکن رولی بار

جمهور رئیس غنی: تیزیم پایه‌لری مستحکم بۉلیشی اوچون دین عالملری‌نینگ اولکن رولی بار

بوگون اېرتلب افغانستان اسلامی جمهورلیک ریاستی‌نینگ جمهور رئیسی افغانستانلیک دین عالملر کېنگشی‌نینگ اعضالری بیلن دیدارلشدی. جمهور رئیسلیک سرایی‌نینگ سلام‌خانه قصریده بۉلیب اۉتگن بو یېریک ییغینده بیرینچی بۉلیب باشقه‌لر نماینده‌لیگیده مولوی محمد نور پادشاه صاحب‌زاده گپیریب، مملکت شهیدلری اینیقسه سۉنگگی حادثه‌لر شهیدلری و مملکتده دایمی بیر تینچلیک و برقرارلیک تامین بۉلیشی اوچون دعا قیلدی.

جمهور رئیس‌نینگ مملکت ترقیاتی و دین عالملریگه کۉرسته‌دیگن اعتباریدن ممنونلیک بیلدیرگن مولوی صاحب‌زاده، افغانستان‌ده‌گی جاری اوروش ایچکری و تشقریدن سوو ایچه‌دی دېدی. اوروش یکونلله‌نیشی نیتده جمهور رئیس‌نینگ منطقه و دنیا بۉیلب اجماع اۉرته‌گه کېلیشی یۉلیده آلیب باره‌جک سعی و حرکتلرینی قۉللب قوتله‌ی میز دېدی اوشبو دین عالمی. دین عالملری کېنگشی‌نینگ قطعنامه‌سیگه موافق افغانستان خلقیدن جمهور رئیسلیک سیلاولرده کېینگ کۉلمده اشتراک قیلیشلرینی سۉره‌دی او. شونینگدېک صاحب‌زاده سیلاو مستقل کمیسیونیدن سیلاو ملی لایحه‌سینی شفافیت بیلن اۉتکزیشنی طلب قیلدی.

مولوی محمد نور پادشاه‌ صاحب‌‌زاده، افغانستان یېر بوتونلیگی و ملی نوامیسنی دفاع قیلیب، اوروش چیزیغلریده قربانلیک بېریب کېلگن افغان ملی کوچلرینی آلقیشلب، مملکت دین عالملری کېنگشی بولرنی هر دایم حمایت قیله‌دی دېدی. کېیین نطق سۉزله‌گن شیخ عبدالله افضلی، حکومت و افغانستان خلقی مملکت‌نینگ دفاعی و امنیتی کوچلرینی کېسکین و کوچلی طرزده هر تامانلمه حمایت اېتیشلری حقیده تاکید قیلدی.

اوزاق ییللردن بېری دوام اېتیب کېلگن اوروش‌نینگ یۉلی توقنشوو اېمس، بیزلر بیر میزنینگ تېوره‌گیده اۉلتیریب بو اوروشگه پایان بېریشیمیز کېره‌ک دېدی جناب افضلی. مملکت تینچلیگی اوچون دنیا و منطقه ملی اجماعی نینگ ایجابی رولی خصوصیده اشاره قیلگن مذکور دین عالمی، یره‌ش لایحه‌سی افغانستان حکومتی‌نینگ یېتکچیلیگیده آلغه آلیب باریلیشی مقصدگه موافق دېدی. او، دین عالملری امنیتی تامین اېتیلیشی، مملکت اېکینچیلری‌نینگ ایچکی محصولاتی   حمایت بۉلیشی همده فراه‌لیک اېکینچیلرنینگ محصولاتی ساتیلیش قیین‌چیلیگی حل بۉلیشی باره‌سیده اشاره قیلیب، اهالیدن ایچکی محصولاتنی صرفلشلرینی سۉره‌دی.

بولرنینگ صحبتلرینی بیرین ـ کېتین اېشیتگن جمهور رئیس غنی، دین عالملرینی خوش کېلدینگیز دېب، روزه ده قیلگن طاعت و عبادتلری الله درگاهیگه قبول بۉلیشنی آرزو قیلدی. عین حالده، ننگرهار ولایتیده شهید اېتیلگن مولوی صفی‌الله و آیت‌الله محقق کابلی‌نینگ عالمدن اۉتیشی مناسبتی بیلن اۉز قیغوداشلیگینی بیلدیردی جمهور رئیس غنی. شانگهای همکارلیکلر تشکیلاتی باشلیغلری ییغینیده اشتراک قیلیش نیتده بوگون رسمی بیشکیککه سفر قیلیشی باره‌سیده اشاره قیلگن جمهور رئیس غنی، مذکور تشکیلاتگه اعضا دولتلرنینگ رهبرلری بیلن ایکّی تامانلمه مناسبت همده تینچلیک مساله‌سی اوچون منطقوی اجماع حقیده گپیریشنی اَیتدی.

دین عالملریگه مراجعه قیلگن جمهور رئیس غنی، تیزیم پایه‌لری مستحکمله‌نیشی اوچون سیزلرنینگ اولکن روللرینگیز بار دېدی. سیزلرنینگ سعی و حرکتینگیز نتیجه‌سیده ملت ودولت بیر ـ بیریگه یقینلشگن دېدی. مملکت امنیتی و دفاعی کوچلری قۉللب قوتله‌نیشی تۉغریسیده دین عالملری‌نینگ حمایتیدن منتدارلیک بیلدیرگن مملکت رهبری، بیز اوروشنی قاره‌لب تینچلیک آوازینی چیقاریب کېلگن میز دېدی. مملکتده‌گی قان تۉکیشلر دین عالملری اجماعی همده حرمین شریفین خطبه‌سینی تن آلمه‌گنلر ذمه‌سیگه قیتیشینی تیلگه آلدی.

خلق‌قه خذمت قیلیش و تینچلیک باره‌سیده‌گی سعی و حرکتلریمیزدن بیر قریچ آرتگه قیتمه‌یمیز دېگن جمهور رئیس غنی، سیزلرنینگ لویه جرگه‌ده آلغه سورگن تکلیفلرینگیز اعتبار بېریب، افغانستان بۉیلب تورمه‌لردن محبوسلر ایرکینلیککه چیقاریلیشی تن آلدیم دېدی. حبس‌دن آزاد بۉلگن کۉپینچه محبوسلر تینچلیک ایلچیلری بۉله‌دی دېیه اشاره قیلدی او. جمهور رئیس غنی، سیلاو مستقل کمیسیونیدن جمهور رئیسلیک سیلاولر شفاف اۉتکزیلیشی اوچون دین عالملرینی دایم سېس چیقاریب توریشنی طلب قیلدی. شونینگدېک فراه ولایتی اېکینچیلری نینگ موجود قیینچیلیگی یېچیلیشی اوچون قندهارده‌گی ۲۰۵ اتل، هلمند ولایتیده‌گی ۲۱۵ میوند و هرات ولایتیده جایلشگن ۲۰۷ ظفر ناملی قول اردولرگه بو ولایت ایچکی محصولاتیدن ایش آلیشلری خصوصیده بویروق بېرگنینی ایتدی.

جمهور رئیس غنی گپلری آخریده قشقاقلیک یۉق قیلینیشی، ارشاد و حج و اوقاف وزیرلیگی ‌نینگ دین عالملریگه کۉپراق اعتبار بېریلیشی و مملکت بۉیلب مسجدلر قیته قوریلیشی و سوو مدیریتی باره‌سیده تاکیدلب، یقینده حضرت امام اعظم (رح)‌نینگ شخصیتینی نشانلش ییغینی‌نینگ بیرینچی کونی لویه‌جرگه خیمه‌سی و ایکّینچی کونی اېسه جمهور رئیسلیک سراییده اۉتکزیلیشینی تیلگه آلدی.#